ப(பி)டித்த கவிதை - அரைக்குட ஆரவாரங்கள்

படித்ததில் பிடித்தது....

அரைக்குட ஆரவாரங்கள் ...

கல்வியேதும் கற்காத கயவர் கூட்டம்

கல்லூரி பள்ளியெனக் கடைவ் ரித்துக்

கல்வியினை விற்கின்ற அவலம் இந்தக்

காசினியில் இங்கன்றி வேறெங் குண்டு ?

செல்வத்தைக் குவிப்பதற்காய்ச் சிந்தை தன்னைச்

சீரழிக்கும் செயலுக்குத் துணையாய் நின்று

அல்வழியில் மதுவிற்று ஆளு கின்ற

அரசாட்சி அரைக்குடத்தின் ஆர வாரம்

சவக்குழியாய்ச் சாலைகள், சாக்க டைகள்;

சந்தையின் நெரிசலெனக் கட்ட டங்கள்

கவர்தலிலே நீர்நிலைகள் எல்லா மிங்கே

காசாகும் பேராசைக் கையூட் டாட்சி;

சுவரோட்டி பெருகிட்ட சுற்றுச் சூழல்;

சூழ்சுவாசக் காற்றெல்லாம் சுரண்டல், ஊழல்;

அவவாழ்வு வாழ்கின்ற அடிமைக் கூட்டம்;

அரசாளும் அரைக்குடங்கள் ஆட்டம், பாட்டம்

ஏருழவர் இல்லத்துள் இருளின் ஆட்சி;

எத்தருக்கே யாவுமெனில் எங்கே மீட்சி ?

வாருகின்ற வரிப்பணத்தைச் சுருட்டி ஏழை

வயிற்றுனிலே அடிப்பதுவோ ? வறுமைக் கோட்டை

வேருடனே நீக்கியதாய் மாயம் காட்டும்

வித்தையிலே மயங்குவதோ ? விழித்தெ ழுந்து

சீருடைய நிறைகுடங்கள் கண்டெ டுப்போம்;

சிதறட்டும் அரைக்குடங்கள் ஆரவாரம்

_கவிஞர்.கே.பி.பத்மநாபன், கோவை

நன்றி : தமிழ் லெமுரியா, மும்